ബഡ്സ് ഡേ ദിനാചരണം സംഘടിപ്പിച്ചു

ബഡ്‌സ് വാരാചരണത്തിന്റെ ഭാഗമായി കുടുംബശ്രീയുടെ നേതൃത്വത്തിൽ ബഡ്സ് ദിനാചരണം സംഘടിപ്പിച്ചു. ബഡ്‌സ് സ്ഥാപനങ്ങൾ ജനകീയമാക്കുന്നതിനും അതിന്റെ പ്രവർത്തനങ്ങൾക്ക് സാമൂഹ്യ പിന്തുണയും പൊതുജനപങ്കാളിത്തവും ഉറപ്പാക്കുന്നതിന്റെ ഭാഗമാഗമായാണ് ബഡ്സ് വിദ്യാർഥികളുടെയും രക്ഷിതാക്കളുടെയും ജീവനക്കാരുടെയും സംഗമം സംഘടിപ്പിച്ചത്. മലപ്പുറം മുനിസിപ്പൽ ടൗൺ ഹാളിൽ നടന്ന ജില്ലാതല സംഗമത്തിന്റെ ഉദ്ഘാടനം ജില്ലാ പഞ്ചായത്ത് പ്രസിഡന്റ് എം.കെ റഫീഖ നിർവ്വഹിച്ചു. പൂക്കോട്ടൂർ ഗ്രാമപഞ്ചായത്ത് പ്രസിഡന്റ് കെ. ഇസ്മയിൽ മാസ്റ്റർ അധ്യക്ഷത വഹിച്ചു. ജില്ലാ കളക്ടർ വി.ആർ. പ്രേംകുമാർ മുഖ്യാതിഥിയായി. മലപ്പുറം നഗരസഭാ അധ്യക്ഷൻ മുജീബ് കാടേരി, നിലമ്പൂർ നഗരസഭാ അധ്യക്ഷൻ മാട്ടുമ്മൽ സലിം, മുതുവല്ലൂർ ഗ്രാമപഞ്ചായത്ത് പ്രസിഡൻറ് ബാബുരാജ്, പള്ളിക്കൽ ഗ്രാമപഞ്ചായത്ത് സ്ഥിരം സമിതി അധ്യക്ഷ സുഹറാബി, തദ്ദേശ സ്വയംഭരണ വകുപ്പ് ജോയിന്റ് ഡയറക്ടർ പ്രീതി മേനോൻ, ജില്ലാ സാമൂഹ്യ നീതി ഓഫീസർ ഷീബ മുംതാസ്, കുടുംബശ്രീ ജില്ലാ മിഷൻ കോഡിനേറ്റർ ജാഫർ കെ കക്കൂത്ത്, മറ്റ് ജനപ്രതിനിധികൾ, ഉദ്യോഗസ്ഥർ തുടങ്ങിയവർ പങ്കെടുത്തു. തുടർന്ന് മോട്ടിവേഷൻ സ്പീക്കർ പി.എം.എ.ഗഫൂർ എന്നിവരുടെ പ്രഭാഷണം, ബഡ്‌സ് വിദ്യാർഥികളുടെ ഫാഷൻ ഷോ, കലാപരിപാടികൾ എന്നിവയും നടന്നു. 

പരിമിതിയിലും പതറാതെ 

പരിമിതിയിലും പതറാതെ മാനസിക വെല്ലുവിളി നേരിടുന്ന വിദ്യാർഥികൾ നിർമിച്ച കരകൗശല വസ്തുക്കളുടെ പ്രദർശന-വിപണന മേളയായി മാറി ജില്ലാതല സംഗമം. വിവിധ വർണ്ണത്തിലും രൂപത്തിലും നിർമ്മിച്ച പൂചെണ്ടുകൾ, നിറങ്ങൾ ചാലിച്ചെഴുതിയ അലങ്കാര ബോട്ടിലുകൾ, വിവിധ രൂപത്തിലും വലിപ്പത്തിലുമുള്ള കുട്ടകൾ, ക്ലീനിങ് ഉത്പന്നങ്ങളായ ഹാൻഡ് വാഷ്, ഡിഷ് വാഷ്, ഫ്ലോർ ക്ലീനർ, ചവിട്ടികൾ തുടങ്ങി മാനസിക വെല്ലുവിളി നേരിടുന്ന വിദ്യാർഥികൾ നിർമിച്ച വിവിധ ഉത്പന്നങ്ങളുടെ പ്രദർശനവും വിപണനവുമാണ് ബഡ്സ് ദിനാചരത്തിന്റെ ഭാഗമായി ടൗൺ ഹാളിൽ ഒരുക്കിയിരുന്നത്. ജില്ലയിലെ വിവിധ ബഡ്സ് സ്‌കൂളുകളിലെ വിദ്യാർഥികളുടെ കരവിരുതിൽ വിരിഞ്ഞ അലങ്കാര വസ്തുക്കളും ക്ലീനിങ് ഉത്പന്നങ്ങളും പ്രദർശനത്തിലുണ്ടായിരുന്നു. ബഡ്സ് സ്ഥാപനങ്ങളിലെ 18 വയസിനു മുകളിലുള്ളവരെ സ്വാശ്രയത്വത്തിലേക്കു നയിക്കുക എന്ന ലക്ഷ്യത്തോടെയാണ് ബഡ്സ് സ്ഥാപനങ്ങളിൽ ഇത്തരം ഉപജീവന കേന്ദ്രങ്ങൾ ആരംഭിച്ചിട്ടുള്ളത്. ഭിന്നശേഷി വിദ്യാർഥികൾക്കൊപ്പമുള്ള അമ്മമാർക്കും സ്ഥിര വരുമാനം ഉറപ്പാക്കുകയാണ് ഇതിലൂടെ ലക്ഷ്യമിടുന്നത്.