വ്യാപാര രംഗത്ത് ഉണ്ടാകുന്ന മാറ്റങ്ങളും ചെറുകിട വ്യാപാരികൾ നേരിടുന്ന വെല്ലുവിളികളും പരിഗണിച്ച് രൂപകൽപ്പന ചെയ്ത ഈ പദ്ധതി, ഒരു നിക്ഷേപ പദ്ധതി മാത്രമല്ലാതെ വ്യാപാരികളെ ഒരുമിപ്പിക്കുന്ന സമഗ്ര സാമ്പത്തിക പ്ലാറ്റ്ഫോമായി അവതരിപ്പിക്കപ്പെടുന്നു.
പദ്ധതിയുടെ ഭാഗമായി ഒരു ലക്ഷം രൂപയുടെ ഒരു ഷെയർ മുഖേന അംഗത്വം നൽകും. ഈ നിക്ഷേപം ചെലവല്ല, മറിച്ച് ഭാവിയിലേക്ക് ഒരു പങ്കാളിത്തമാണെന്ന് സംഘാടകർ വ്യക്തമാക്കി.
പദ്ധതിയിലൂടെ പുതിയ വ്യവസായ സംരംഭങ്ങൾ ആരംഭിക്കൽ, നിലവിലുള്ള ബിസിനസുകൾ വികസിപ്പിക്കൽ, ലാഭകരമായ പ്രോജക്ടുകൾ ഏറ്റെടുക്കൽ, ആവശ്യമായിടത്ത് സ്ഥാപനങ്ങൾ സ്വന്തമാക്കി വളർത്തൽ എന്നിവ ലക്ഷ്യമിടുന്നു. കൂടാതെ, യുവാക്കൾക്ക് സംരംഭകത്വ പരിശീലനവും തൊഴിൽ അവസരങ്ങളും സൃഷ്ടിക്കുന്നതിലും പദ്ധതി ശ്രദ്ധ കേന്ദ്രീകരിക്കുന്നു.
VIBES അംഗങ്ങൾക്ക് സംരംഭങ്ങളിൽ നിന്നുള്ള ലാഭത്തിൽ നിന്ന് വാർഷിക ലാഭവിഹിതം നൽകുന്നതാണ് പ്രധാന ആനുകൂല്യങ്ങളിൽ ഒന്ന്. ഇതോടൊപ്പം കുടുംബങ്ങൾക്ക് ദീർഘകാല സാമ്പത്തിക സുരക്ഷ, മക്കൾക്ക് ബിസിനസ് മാർഗനിർദ്ദേശം, പരിശീലനം, നെറ്റ്വർക്ക് അവസരങ്ങൾ എന്നിവയും ലഭ്യമാക്കുമെന്ന് അധികൃതർ അറിയിച്ചു.
അംഗങ്ങൾക്കായി വിവിധ സ്ഥാപനങ്ങളിൽ പ്രത്യേക ഡിസ്കൗണ്ടുകൾ, ട്രേഡിംഗ് ആനുകൂല്യങ്ങൾ, അക്കൗണ്ടിംഗ്, മാർക്കറ്റിംഗ്, കൺസൾട്ടിംഗ് സേവനങ്ങളിൽ സഹായങ്ങൾ എന്നിവയും നടപ്പിലാക്കാൻ ഉദ്ദേശിക്കുന്നുണ്ട്.
“ഒറ്റപ്പെട്ട് മുന്നേറുന്നത് ഇന്ന് വ്യാപാരികൾക്ക് ബുദ്ധിമുട്ടാണ്. എന്നാൽ കൂട്ടായ്മയായി പ്രവർത്തിക്കുമ്പോൾ വലിയ പ്രോജക്ടുകൾ സ്വന്തമാക്കാനും പുതിയ വ്യവസായങ്ങൾ തുടങ്ങാനും കഴിയുമെന്ന്” സംഘാടകർ ചൂണ്ടിക്കാട്ടി.
യൂണിറ്റ് തല ജനറൽ ബോഡി യോഗങ്ങളെ ഷെയർ വിതരണം നടത്തുന്നതിനുള്ള വേദികളാക്കി ഉപയോഗിക്കാൻ തീരുമാനിച്ചിട്ടുണ്ട്. ഇന്ന് തന്നെ പങ്കാളികളാകുന്നവർ നാളെയുടെ വലിയ സംരംഭങ്ങളുടെ സ്ഥാപക അംഗങ്ങളാകുമെന്നും നേതാക്കൾ അഭിപ്രായപ്പെട്ടു.
0 Comments