പുതിയങ്ങാടി നേർച്ചയ്ക്കിടെ ആനയിടിഞ്ഞു. 29 പേർക്കു പരുക്ക്. രണ്ടുപേരുടെ നില ഗുരുതരം

തിരൂർ: പുതിയങ്ങാടി നേർച്ചയ്ക്ക് ആനയിടഞ്ഞു. 29 പേർക്ക് പരുക്ക്. ഇതിൽ 2 പേരുടെ നില ഗുരുതരം. ഇന്നലെ രാത്രി ഒരു മണിയോടെയാണ് സംഭവം. തുവ്വക്കാട് പോതന്നൂരിൽ നിന്ന് ജാറത്തിലെത്തിയ പെട്ടി വരവിൽ ഉണ്ടായിരുന്ന പൊക്കാട് ശ്രീക്കുട്ടൻ എന്ന ആനയാണ് ഇടഞ്ഞത്. ഈ വരവിൽ 5 ആനകൾ ഉണ്ടായിരുന്നു. ജാറം മൈതാനത്ത് എത്തിയ വരവിൽ നിന്ന് ശ്രീക്കുട്ടൻ എന്ന ആന പൊടുന്നനെ മുന്നോട്ടു കുതിക്കുകയായിരുന്നു. തുടർന്ന് ഒരാളെ തൂക്കിയെടുത്ത് ചുഴറ്റി എറിഞ്ഞു. ഇയാളെ ഗുരുതര പരുക്കുകളോടെ കോട്ടയ്ക്കലിലെ സ്വകാര്യ ആശുപത്രിയിൽ പ്രവേശിപ്പിച്ചിട്ടുണ്ട്. ആളെ തിരിച്ചറിയാൻ സാധിച്ചിട്ടില്ല. ആന മുന്നോട്ടു കുതിക്കുന്നതിനിടെയാണ് മറ്റുള്ളവർക്കു പരുക്കു പറ്റിയത്. ഇവരെ തിരൂർ അന്നാരയിലെയും ആലത്തിയൂരിലെയും സ്വകാര്യ ആശുപത്രികളിൽ പ്രവേശിപ്പിച്ചു. ഉടനെ മറ്റ് ആനകളെ സ്ഥലത്തു നിന്നു മാറ്റിയിരുന്നു. സംഭവത്തെ കുറിച്ച് പൊലീസും വനംവകുപ്പും അന്വേഷണം ആരംഭിച്ചിട്ടുണ്ട്.