2006 മുതൽ സിപിഐ(എം) സഹയാത്രികനായി പ്രവർത്തിച്ച തനിക്ക് പാർട്ടി നൽകിയ പിന്തുണയും വിശ്വാസവും ഒരിക്കലും മറക്കാനാകില്ലെന്ന് ജലീൽ പറഞ്ഞു. മലപ്പുറം ജില്ലയിൽ നിന്ന് നാല് തവണ എം.എൽ.എയായും അഞ്ച് വർഷം മന്ത്രിയായും പ്രവർത്തിക്കാൻ അവസരം നൽകിയ പാർട്ടിയോട് എക്കാലവും കടപ്പെട്ടിരിക്കുമെന്നും അദ്ദേഹം കുറിപ്പിൽ വ്യക്തമാക്കി.
രാജ്യത്ത് വർഗീയ-ഫാസിസ്റ്റ് ശക്തികൾ ശക്തിപ്പെടുന്ന സാഹചര്യത്തിൽ ഇടതുപക്ഷ രാഷ്ട്രീയത്തിന്റെ പ്രസക്തി വർധിച്ചിട്ടുണ്ടെന്നും ദുർബല ജനവിഭാഗങ്ങളുടെയും മതന്യൂനപക്ഷങ്ങളുടെയും സംരക്ഷണത്തിന് ശക്തമായ ഇടതുപക്ഷ സാന്നിധ്യം അനിവാര്യമാണെന്നും അദ്ദേഹം അഭിപ്രായപ്പെട്ടു. കമ്മ്യൂണിസ്റ്റ് പാർട്ടികളെ ദുർബലപ്പെടുത്താനുള്ള ശ്രമങ്ങൾക്കെതിരെ ശക്തമായ പ്രതിരോധം തീർക്കേണ്ടതുണ്ടെന്നും അതിന്റെ ഭാഗമായാണ് അംഗത്വം സ്വീകരിക്കുന്നതെന്നും ജലീൽ പറഞ്ഞു.
മതവിശ്വാസവും കമ്മ്യൂണിസ്റ്റ് ആശയവും പരസ്പരവിരുദ്ധമല്ലെന്നും ഒരാൾക്ക് നല്ല വിശ്വാസിയും നല്ല കമ്മ്യൂണിസ്റ്റുകാരനുമായി ഒരേസമയം നിലകൊള്ളാനാകുമെന്നും അദ്ദേഹം ചൂണ്ടിക്കാട്ടി. മതവിശ്വാസികളെ കമ്മ്യൂണിസ്റ്റ് പാർട്ടികളിൽ നിന്ന് അകറ്റാനുള്ള പ്രചാരണങ്ങൾ അപകടകരമാണെന്നും അദ്ദേഹം വിമർശിച്ചു.
പാർട്ടി പ്രതിസന്ധികൾ നേരിടുന്ന ഘട്ടത്തിൽ അതിനൊപ്പമുണ്ടാകുന്നതാണ് ശരിയായ രാഷ്ട്രീയ ധർമ്മമെന്ന് വ്യക്തമാക്കിയ ജലീൽ, കർഷകർ, തൊഴിലാളികൾ, സ്ത്രീകൾ, ന്യൂനപക്ഷങ്ങൾ, യുവാക്കൾ, വിദ്യാർത്ഥികൾ തുടങ്ങി സമൂഹത്തിന്റെ വിവിധ വിഭാഗങ്ങളെ ഉൾക്കൊള്ളുന്ന വിശാലമായ കൂട്ടായ്മയാണ് സിപിഐ(എം) എന്ന നിലപാടും പങ്കുവെച്ചു.
0 Comments