അനുവാദമില്ലാതെ ഓണ്‍ലൈന്‍ റമ്മി പരസ്യത്തില്‍ ചിത്രം ഉപയോഗിച്ചു; ആക്ടിവിസ്റ്റ് ഉനൈസ്

കോഴിക്കോട്: അനുവാദമില്ലാതെ ഓൺലൈൻ റമ്മി പരസ്യത്തിൽ തന്‍റെ ചിത്രം ഉപയോഗിക്കുന്നുവെന്ന് ക്വിയർ ആക്ടിവിസ്റ്റ് മുഹമ്മദ് ഉനൈസ്. ഗെയിമിംഗ് കമ്പനിയായ ജംഗ്ലി റമ്മി ഉനൈസിന്‍റെ അനുവാദമില്ലാതെയാണ് ചിത്രം പരസ്യത്തിനായി ഉപയോഗിച്ചത്. കേരളത്തിലെ വിവിധ ജില്ലകളെ പ്രതിനിധീകരിച്ച് റമ്മി കളിച്ച് ആളുകൾ പണം സമ്പാദിച്ചുവെന്ന് അവകാശപ്പെടുന്ന പരസ്യത്തിൽ ഉനൈസിന്‍റെ ചിത്രവും ഉൾപ്പെടുത്തിയിട്ടുണ്ട്. എന്നാൽ, അത്തരമൊരു പരസ്യം താൻ ശ്രദ്ധിച്ചിരുന്നില്ലെന്നും താൻ റമ്മി കളിക്കാരനല്ലെന്നും ഉനൈസ് പറഞ്ഞു. ഫെയ്സ്ബുക്കിലും മറ്റ് സോഷ്യൽ മീഡിയ പ്ലാറ്റ്ഫോമുകളിലും സ്പോൺസേഡായി വരുന്ന വീഡിയോ പരസ്യത്തിലും ഉനൈസിന്‍റെ ചിത്രം ഉപയോഗിച്ചിട്ടുണ്ട്. "എന്‍റെ അനുവാദമില്ലാതെ ഉപയോഗിച്ച ചിത്രമാണിത്. ഇതുപോലുള്ള പരസ്യങ്ങളിൽ ഫോട്ടോ എടുക്കാൻ ഞാൻ ആഗ്രഹിക്കുന്നില്ല. എന്നോട് അനുവാദം ചോദിച്ചാൽ പോലും, ഞാൻ അത് നൽകില്ലായിരുന്നു. ഇത് തെറ്റിദ്ധരിപ്പിക്കുന്ന നീക്കമാണ്,ഉനൈസ് പറഞ്ഞു.