കുറ്റിപ്പുറം പഞ്ചായത്തിൻ്റെ ധിക്കാരപരമായ സമീപനത്തിനെതിരെ വ്യാപാരികളുടെ പ്രതിഷേധം

കുറ്റിപ്പുറം: പഞ്ചായത്തിൻ്റെ ധിക്കാരപരമായ നടപടിക്കെതിരെ കുറ്റിപ്പുറം വ്യാപാരി വ്യവസായി ഏകോപന സമിതി വാർത്താസമ്മേളനം നടത്തി.

വർഷങ്ങളായി വ്യാപാരികൾ ഉന്നയിച്ചുവരുന്ന ടൗണിലെ മാലിന്യ പ്രശ്നം, അഴുക്കുചാൽ വൃത്തിയാക്കൽ, അലഞ്ഞു തിരിയുന്ന കന്നുകാലികൾ, തെരുവുനായ്ക്കൾ, തിരൂർ റോഡ്, വൺവേ റോഡുകളിലെ സ്റ്റ്രീറ്റ് ലൈറ്റുകൾ പ്രവർത്തിക്കാത്തത്, നിളയോര പാർക്കിനോട് ചേർന്ന സ്റ്റേഡിയവും നടപ്പാതയും, തെരുവോരങ്ങളിലെ അനധികൃത കച്ചവടങ്ങൾ, കടമുന്നിൽ ഓട്ടോ-ടാക്സി പാർക്കിംഗ്, ലോറി പാർക്കിംഗ്, ബസ് സ്റ്റാൻഡ് നിർമ്മാണം, റോഡ് അതിർത്തി മാർക്കിംഗ്, ആഴ്‌ചചന്ത, റെയിൽസ്റ്റേഷൻ റോഡ് കൈയ്യേറ്റം തുടങ്ങി നിരവധി വിഷയങ്ങൾ പഞ്ചായത്തിലും പോലീസിലും മറ്റ് വകുപ്പുകളിലും നിരവധി തവണ പരാതി നൽകിയിട്ടും നടപടിയുണ്ടായിട്ടില്ലെന്നു വ്യാപാരികൾ ആരോപിച്ചു.

കുറ്റിപ്പുറത്ത് കൂടിക്കടന്നുപോകുന്ന നാഷണൽ ഹൈവേയ്ക്ക് Entry, Exit അനുവദിക്കണമെന്ന ആവശ്യം വ്യാപാരികളുടെ നേതൃത്വത്തിൽ സർവ്വകക്ഷി യോഗം ചേർന്ന് പഞ്ചായത്ത് മുഖേന ഡൽഹിയിലെ ബന്ധപ്പെട്ട വകുപ്പുകളിലേക്കു കൈമാറിയതോടെ അനുകൂല തീരുമാനം ഉണ്ടായതായി സംഘടന ചൂണ്ടിക്കാട്ടി. കൂടാതെ കുറ്റിപ്പുറം റെയിൽവേ സ്റ്റേഷൻ **'അമൃത ഭാരത് പദ്ധതി'**യിൽ ഉൾപ്പെടുത്തപ്പെട്ടിട്ടും പഞ്ചായത്ത് അതിനെതിരെ സമീപനം സ്വീകരിച്ചുവെന്ന കാര്യവും വ്യാപാരികൾ വെളിപ്പെടുത്തി.

വ്യാപാരി സംഘടന നൽകിയ പരാതികളുടെ അടിസ്ഥാനത്തിൽ 31/07/2025-ന് പഞ്ചായത്ത് ഭരണ സമിതി നടപടി സ്വീകരിക്കാമെന്ന് തീരുമാനിച്ചിരുന്നുവെങ്കിലും ഇന്നുവരെ ഒന്നും നടന്നിട്ടില്ലെന്നു നേതാക്കൾ പറഞ്ഞു.

പ്രശ്നങ്ങൾക്ക് ഉടൻ പരിഹാരമില്ലെങ്കിൽ ഹൈക്കോടതിയെയും ഓംബുഡ്സ്മാനെയും സമീപിക്കുമെന്നും 18/09/2025-ന് ചേർന്ന സംഘടനയുടെ എക്‌സിക്യൂട്ടീവ് യോഗം തീരുമാനിച്ചതായും വാർത്താസമ്മേളനത്തിൽ വ്യക്തമാക്കി.

വ്യാപാരി വ്യവസായി ഏകോപന സമിതിയുടെ കുറ്റിപ്പുറം യൂണിറ്റ് പ്രസിഡൻ്റ് കെ.പി. അബ്ദുൽ കരീം, സെക്രട്ടറി ജൗഹർ അലി, ട്രഷറർ കെ.പി. ഇസ്ഹാക്ക്, തടത്തിൽ നാരായണൻ എന്നിവർ വാർത്താസമ്മേളനത്തിൽ പങ്കെടുത്തു.