ad

Ticker

6/recent/ticker-posts

മങ്കട ബ്ലോക്ക് പഞ്ചായത്തിൽ മെഗാ ജോബ് മേള നവംബർ 7ന്; 750ലധികം തൊഴിലവസരങ്ങൾ

Uploaded Image
മങ്കട: മങ്കട ബ്ലോക്ക് പഞ്ചായത്തും പെരിന്തൽമണ്ണ ജി-ടെക്കും സംയുക്തമായി സംഘടിപ്പിക്കുന്ന മെഗാ ജോബ് മേള നവംബർ 7 ശനിയാഴ്ച രാവിലെ 9 മണി മുതൽ നടക്കും. തൊഴിൽമേളയുടെ പ്രചാരണ പ്രവർത്തനങ്ങളുടെ ഭാഗമായി തയ്യാറാക്കിയ ലോഗോയുടെ പ്രകാശനം വ്യവസായ, വിവരസാങ്കേതിക വകുപ്പ് മന്ത്രി പി.കെ. കുഞ്ഞാലിക്കുട്ടി നിർവഹിച്ചു.

40ലധികം പ്രമുഖ കമ്പനികൾ പങ്കെടുക്കുന്ന തൊഴിൽമേളയിൽ 750ലധികം തൊഴിലവസരങ്ങളാണ് ഉദ്യോഗാർഥികൾക്കായി ഒരുക്കുന്നത്. തൊഴിൽ അന്വേഷിക്കുന്നവർക്ക് വിവിധ മേഖലകളിലെ അവസരങ്ങൾ പരിചയപ്പെടുത്തുന്നതിനും അഭ്യസ്തവിദ്യരായ ഉദ്യോഗാർഥികൾക്ക് അവരുടെ യോഗ്യതയ്ക്കും കഴിവുകൾക്കും അനുയോജ്യമായ ജോലി കണ്ടെത്തുന്നതിനും അവസരമൊരുക്കുകയാണ് മേളയുടെ ലക്ഷ്യം.

തൊഴിൽദാതാക്കളെയും ഉദ്യോഗാർഥികളെയും ഒരേ വേദിയിൽ എത്തിക്കുന്നതിലൂടെ കമ്പനികളുമായി നേരിട്ട് ബന്ധപ്പെടാനും അനുയോജ്യമായ തൊഴിലവസരങ്ങൾ കണ്ടെത്താനും സാധിക്കും. യുവജനങ്ങളുടെ തൊഴിൽക്ഷമത വർധിപ്പിക്കുകയും തൊഴിൽ സാധ്യതകൾ വിപുലപ്പെടുത്തുകയും ചെയ്യുന്നതിനൊപ്പം സാമ്പത്തിക സ്വയംപര്യാപ്തത കൈവരിക്കാനും ഇത്തരം സംരംഭങ്ങൾ സഹായകമാകുമെന്നാണ് പ്രതീക്ഷ.

ലോഗോ പ്രകാശന ചടങ്ങിൽ മങ്കട ബ്ലോക്ക് പഞ്ചായത്ത് പ്രസിഡന്റ് കെ.വി. ജുവൈരിയ ടീച്ചർ, വൈസ് പ്രസിഡന്റ് ഹനീഫ പെരിഞ്ചേരി, സ്ഥിരംസമിതി അധ്യക്ഷൻ സാദിഖലി പാത്തിക്കൽ, ബ്ലോക്ക് പഞ്ചായത്ത് അംഗങ്ങളായ ഷെഫീഖ് മാസ്റ്റർ, എം.ടി. റാഫി, സമീറ തോട്ടോളി, ജനറൽ എക്സ്റ്റൻഷൻ ഓഫീസർ കൃഷ്ണപ്രസാദ്, വിജ്ഞാനകേരളം കോ-ഓർഡിനേറ്റർ ഷിബിലി, പ്രോജക്ട് അസിസ്റ്റന്റ് ഫൈസൽ എന്നിവർ പങ്കെടുത്തു.

Post a Comment

0 Comments